ბაზარზე დასაქმების ახალი ციფრული პლატფორმა openjobs.ge გამოჩნდა. როგორც პლატფორმის თანადამფუძნებელმა მარად ბარამიძემ „ბიზნესპარტნიორთან“ განაცხადა, openjobs.ge კომპანიებს ვაკანსიების განთავსების გარდა, სარეკლამო მენეჯერის, ციფრული ასისტენტის და ელექტრონული ფოსტის მხარდაჭერას სთავაზობს.
მისივე ინფორმაციით, პლატფორმაზე შესაძლებელი იქნება რეზიუმეს სკრინინგიც, თუ რამდენად თავსებადია კანდიდატი გამოცხადებულ ვაკანსიასთან.
„საქართველოში დაბალი და საშუალო რგოლის სამუშაოებზე ყოველწლიურად ათიათასობით ვაკანსია ქვეყნდება. კომპანიები ვაკანსიის გამოცხადების შემდეგ პერსონალის მოძიებისთვის განკუთვნილი დროის დაახლოებით, 80%-ს უშედეგოდ ხარჯავენ. ამავდროულად კომპანიების დაახლოებით, 60%-ს პრობლემა ექმნება გამართულად ფუნქციონირებაში. შესაბამისად გვსურს, რომ დავეხმაროთ კომპანიებს დაბალი და საშუალო რგოლის მოძიებაში.
ბიზნესებს ვთავაზობთ ციფრული ასისტენტის მხარდაჭერას, რომელიც დაუზოგავთ დროს და შემოსული რეზიუმეების სკრინინგს გააკეთებს, რომ ეს ადამიანი ნამდვილად შესაფერესია თუ არა გამოცხადებულ ვაკანსიაზე. პარალელურად ვთავაზობთ სარეკლამო მენეჯერის მომსახურებას. ყველა ბიზნესს არ აქვს ის ფუფუნება, რომ სოც.მედია მენეჯერი ჰყავდეს. ციფრული არხებით რეკლამა აუცილებელია დღეს, ამიტომ შეუძლიათ თავად დაგეგმონ კამპანიები და გავიდნენ იმ შედეგზე რისი მოლოდინიც აქვთ. ამ ეტაპზე აღნიშნული მომსახურებით სატესტოდ 5 კომპანია სარგებლობს.
ასევე, ვთავაზობთ ელექტრონული ფოსტის მხარდაჭერას – კომპანიებს შეეძლებათ, რომ ჩვენს მიერ შეთავაზებულ ელექტრონულ ფოსტაზე, ან სააპლიკაციო ფორმაზე, როდესაც რეზიუმე შევა მარტივად მოახერხონ სკრინინგი. მათ ეცოდინებათ ვის უნდა დაურეკონ. პარალელურად, საიტი იზრუნებს იმაზე, რომ ვაკანსიის გამოცხადების შემდეგ კომპანიას შესთავაზებს პლატფორმაზე რეგისტრირებული კანდიდატებიდან, მისთვის შესაფერის კადრს“, – განაცხადა მარად ბარამიძემ.
რაც შეეხება ვაკანსიის განთავსების ფასებს – ეს დამოკიდებულია იმაზე ერთჯერადად სურს კომპანიას ვაკანსიის განთავსება, თუ მრავალჯერადად.
ცნობისთვის, საიტზე უკვე 70 მდე ვაკანსიაა განთავსებული და openjobs.ge 30-მდე კომპანიასთან თანამშრომლობს. რაც შეეხება სამუშაოს მაძიებელთა გამოხმაურებას, მათივე ცნობით, პორტალს ყოველდღიურად მინიმუმ 2 ათასი ადამიანი სტუმრობს. ამასთან, ყოველდღიურად საშუალოდ 128 რეზიუმე იგზავნება საიტის დახმარებით.
დასაქმება, ვაკანსიები, ბათუმში, თბილისში, vakansia, vakansiebi, dasaqmeba, tbilisshi, batumshi
